Toshkent, O‘zbekiston (UzDaily.uz) — Hindistonning Gujarat shtatida joylashgan Axmedabad shahri aeroportida Air India aviakompaniyasiga tegishli yo‘lovchi samolyoti parvoz vaqtida halokatga uchradi. Bortda jami 244 kishi bo‘lgan.

Hind OAV xabarlariga ko‘ra, gap Boeing 787-8 Dreamliner samolyoti haqida ketmoqda. U AI 171 reysi bo‘yicha Londonga yo‘l olgan edi. Guvohlarning so‘zlariga qaraganda, samolyot tushgan Megxaninagar tumanida kuchli portlashlar eshitilgan va shundan so‘ng yong‘in chiqqan.

Hozirgi vaqtda halokatda jabrlanganlar yoki halok bo‘lganlar soni, shuningdek, falokatning ehtimoliy sabablari haqida rasmiy maʼlumot berilmagan. Hodisa sodir bo‘lgan hudud politsiya tomonidan to‘sib qo‘yilgan.

Hodisa joyida o‘t o‘chiruvchilar, qutqaruv xizmati va tibbiy brigadalar ish olib bormoqda.

Aeroport maʼmuriyati ichki xizmat tekshiruvini boshladi. Shu bilan birga, maxsus tergov guruhi vaziyatni o‘rganmoqda.

Aeroportga olib boradigan yo‘llar vaqtincha yopib qo‘yilgan.