Toshkent, O‘zbekiston (UzDaily.uz) — Milliy qayta sug‘urtalash kompaniyasi (MQSK)ga rahbar etib Anvarjon G‘afforov tayinlandi. U bu lavozimga kelgunga qadar “Hamkor Sug‘urta” aksiyadorlik jamiyatiga rahbarlik qilib kelgan.

Yagona davlat reyestri maʼlumotlariga ko‘ra, kompaniya 2025 yil 18 iyulda rasman ro‘yxatdan o‘tgan. Uning tashkil etilishi 2025 yil 23 maydagi Prezident qarori (№PP-191) bilan belgilangan edi.

Milliy qayta sug‘urtalash kompaniyasining asosiy vazifasi — O‘zbekistonda amalga oshirilayotgan yirik investitsiya loyihalarini, shu jumladan xorijiy va mahalliy investorlar ishtirokidagi loyihalarni qayta sug‘urtalash orqali himoya qilishdan iborat bo‘ladi. Bu qadam mamlakatda investitsiya muhitini yana-da barqaror va jozibador qilishga xizmat qilishi kutilmoqda.

Istiqbolli loyihalar milliy agentligi kompaniyaning 80 milliard so‘mlik dastlabki aksiya chiqarilishini tasdiqladi. Ushbu mablag‘ kompaniyaning ustav kapitali shakllanishi uchun yo‘naltiriladi.

Prezident qaroriga muvofiq, 2025 yilda kompaniya oldiga qator ustuvor vazifalar qo‘yilgan:

— ichki qayta sug‘urtalash bozori hajmini 4 trln so‘mga yetkazish;

— qayta sug‘urtalash xizmatlari eksportini kamida 30 foizga oshirish;

— xalqaro hamkorlikni kengaytirish va tarmoqqa 150 milliard so‘m investitsiya jalb qilish.

MQSK barcha turdagi qayta sug‘urtalash faoliyatini amaldagi qonunchilik doirasida amalga oshiradi. Kompaniyaning ustuvor yo‘nalishlari orasida to‘g‘ridan-to‘g‘ri va portfel investitsiyalarini kompleks himoya qilish, shuningdek xorijiy va mahalliy sarmoyadorlar ishtirokidagi yirik loyihalar uchun sug‘urta kafolatini taʼminlash bor.

Kompaniyaning ustav kapitali kamida 300 mlrd so‘m (taxminan 23 mln AQSH dollari) etib belgilangan bo‘lib, bu ko‘rsatkich MQSKni ichki bozordagi eng yirik sug‘urta tashkilotlaridan biriga aylantiradi. Ustav kapitalining 50 foizi davlat ulushiga tegishli bo‘ladi, davlat nomidan esa kompaniyadagi aksiyalarni NAPP boshqaradi.

Xalqaro Moody‘s Ratings agentligi taʼkidlashicha, Milliy qayta sug‘urtalash kompaniyasining tashkil etilishi O‘zbekiston sug‘urta bozorini barqarorlashtirish, ichki resurslarni birlashtirish va mamlakat moliyaviy tizimining mustahkamligini oshirishda muhim qadam hisoblanadi.