Toshkent, O‘zbekiston (UzDaily.uz) — Xitoy Elektronika Savdo Palatasi (CECC), "O'zeltexsanoat" uyushmasi va "Artel Electronics" kompaniyasi o‘rtasida uch tomonlama anglashuv memorandumi imzolandi.

Toshkent shahrida Xitoy Elektronika Savdo Palatasi (CECC) prezidenti Van Ning boshchiligidagi delegatsiya tashrifi doirasida muhim kelishuvga erishildi. Tadbirda “O‘zeltexsanoat” uyushmasi raisi Mirziyod Yunusov hamda “Akfa Group” kompaniyasi asoschisi Jahongir Ortiqxo‘jayev ishtirok etdi.

Uchrashuv davomida tomonlar O‘zbekiston va Xitoy o‘rtasidagi iqtisodiy va texnologik hamkorlikni yanada rivojlantirish masalalarini muhokama qildilar. Natijada elektronika, elektrotexnika va yuqori texnologiyalar sohasida keng qamrovli uch tomonlama anglashuv memorandumi imzolandi.

Mazkur kelishuv mahalliy ishlab chiqarish quvvatlarini kengaytirish, qo‘shma innovatsion loyihalarni amalga oshirish, zamonaviy texnologiyalarni joriy etish hamda ilmiy-tadqiqot faoliyatini rivojlantirishni nazarda tutadi.

Shuningdek, memorandum doirasida eksport bozorlarini kengaytirish, xalqaro kooperatsiyani mustahkamlash va yangi investitsiya loyihalarini hayotga tatbiq etish bo‘yicha hamkorlik qilish rejalashtirilgan. Bu kelishuv ikki davlat biznes doiralari o‘rtasida barqaror sheriklikni ta’minlab, O‘zbekistonda elektrotexnika sanoatini yangi bosqichga olib chiqishi kutilmoqda.

Tadbir yakunida Van Ning O‘zbekistonda yaratilayotgan investitsiyaviy sharoitlarni yuksak baholadi va kelgusida qo‘shma loyihalarni amalga oshirishda CECC a’zolari faol ishtirok etishini ta’kidladi.