Farg‘onada 2 mlrd so‘mlik deklaratsiyalanmagan yuk aniqlandi

Toshkent, O‘zbekiston (UzDaily.uz) — Farg‘ona viloyati bojxona organlari xodimlari Xitoydan olib kelingan, deklaratsiyada ko‘rsatilmagan yoki boshqa nomlar bilan rasmiylashtirilgan yirik tovar partiyasini aniqladi. Topilgan mahsulotlar qiymati 2 milliard so‘mdan oshadi.

Tekshiruv “Qo‘qon” bojxona posti xodimlari tomonidan kontrabandaga qarshi kurash bo‘linmasi bilan hamkorlikda o‘tkazildi. Ko‘rikdan mahalliy kompaniyalardan biri nomiga Xitoydan kelgan va erkin muomala rejimida rasmiylashtirish uchun taqdim etilgan yuk o‘tkazildi.

Taqdim etilgan hujjatlarga ko‘ra, partiya tarkibida umumiy og‘irligi 25 tonna bo‘lgan 14 turdagi tovar mavjud bo‘lgan.

Biroq kompaniya vakili ishtirokida o‘tkazilgan bojxona ko‘rigi jarayonida yukning amaldagi tarkibi bilan deklaratsiyada ko‘rsatilgan maʼlumotlar o‘rtasida jiddiy tafovutlar aniqlangan.

Bojxona organlari maʼlumotiga ko‘ra, mahsulotlarning bir qismi umuman deklaratsiya qilinmagan, ayrim tovarlar esa boshqa nomlar ostida rasmiylashtirilgan.

Tekshiruv natijasida umumiy qiymati 2 milliard so‘mdan ortiq bo‘lgan yetti turdagi qariyb 16 tonna tovar aniqlandi.

Aniqlangan barcha mahsulotlar musodara qilingan. Mazkur holat yuzasidan tergovga qadar tekshiruv ishlari olib borilmoqda.