Toshkent, O‘zbekiston (UzDaily.uz) — Joriy yilning 26-avgust kuni Jahon banki delegatsiyasi vakillari hamda O‘zbekiston Respublikasi Iqtisodiyot va moliya vazirining birinchi o‘rinbosari Ilhom Norqulov o‘rtasida uchrashuv bo‘lib o‘tdi.

Uchrashuvda Xalqaro moliya korporatsiyasining O‘zbekistondagi vakolatxonasi rahbari Nil Makkeyn, Jahon bankining yetakchi iqtisodchisi Martin Melekki, Jahon bankining moliyaviy sektor bo‘yicha yetakchi mutaxassislari Yerali Beksultan va Valeriya Goffe hamda Iqtisodiyot va moliya vazirligi departamenti direktori Timur Xusanov, “Tadbirkorlikni rivojlantirish kompaniyasi” AJ direktori Abbosxon Maxamatov va boshqa mas’ul vakillar ishtirok etdi.

Muloqot davomida tomonlar mamlakatimizda kichik va o‘rta tadbirkorlikni rivojlantirishda hamkorlikni kengaytirish, ushbu yo‘nalishda qo‘shma tashabbus va loyihalarni amalga oshirish masalalari yuzasidan muhokamalar olib bordi.

Xususan, muhokamalar davomida tomonlar quyidagi masalalarga alohida to‘xtalib o‘tdi.

kichik va o‘rta biznes subyektlarini qo‘llab-quvvatlash, ularning moliyaviy resurslarga kengroq kirishini ta’minlash hamda moliyaviy inklyuzivlikni rivojlantirish;

FINGROW (Financial Inclusion for Growth, Returns, and Opportunities for Work) dasturiy yondashuvi doirasida yangi loyihalarni ishlab chiqish va amalga oshirish;

kichik va o‘rta biznesni rivojlantirish orqali sifatli va rasmiy bandlikni kengaytirish, tadbirkorlik subyektlarining imkoniyatlarini oshirish.

Muzokaralar yakunida tomonlar o‘zaro hamkorlik aloqalarini rivojlantirish hamda yuqoridagi yo‘nalishlar yuzasidan fikr almashinuvi jarayonlarini kengaytirishga kelishib oldi.