Toshkent, O‘zbekiston (UzDaily.uz) — O‘zbekiston Markaziy banki yirik bank o‘tkazmalari ustidan nazoratni kuchaytirish niyatida. Bu haqda Markaziy bank raisi o‘rinbosari Sodir Melibayev Oliy Majlis Qonunchilik palatasi deputatlari oldidagi chiqishi davomida maʼlum qildi.

Ayni vaqtda to‘lov xizmatlari sohasini tartibga soluvchi va huquqbuzarliklarning oldini olishga qaratilgan qonun loyihasi ishlab chiqilmoqda. Xususan, onlayn-to‘lovlar bilan bog‘liq firibgarlik holatlari ko‘payib borayotganini inobatga olgan holda, foydalanuvchilarni aniqlash uchun antifrod tizimlar va biometrik texnologiyalarni joriy etish rejalashtirilgan.

Shuningdek, to‘lov xizmatlari bozori ishtirokchilarining qoidabuzarliklari uchta toifaga — qo‘pol, jiddiy va yengil buzilishlarga — ajratilishi nazarda tutilgan bo‘lib, har biri uchun tegishli jazo choralari belgilanadi.

Melibayevning taʼkidlashicha, regulyatorga isteʼmolchilar huquqlarini muhofaza qilishni kuchaytirish uchun qo‘shimcha vakolatlar ham beriladi, biroq bu masaladagi aniq tafsilotlar hozircha oshkor etilmagan.