Toshkent, O‘zbekiston (UzDaily.uz) — Zahiriddin Muhammad Bobur nomidagi markaziy Ekopark bogʻida Oʻzbekiston skvosh va padel federatsiyasining tantanali ochilish marosimi boʻlib oʻtdi.

Tadbirda Sport vazirligi va Milliy Olimpiya qoʻmitasi rahbariyati, Unda Qatarning Oʻzbekistondagi Favquloddagi va Muxtor elchisi Hasan Hamza Hoshim, Xalqaro sport rasmiysi, Xalqaro kibersport federatsiyasining sobiq Prezidenti Vlad Marinesku, skvosh va padel federatsiyasi mutasaddilari, shuningdek, ushbu sport turlarining muxlislari ishtirok etishdi.

Rasmiylar yangi federatsiya oʻz ishini boshlagani bilan barchani qutlab, tashkilotning kelgusi faoliyatiga omad tilashdi. Ushbu sport turlari dunyo boʻylab oʻz ommaviyligini tobora oshirib bormoqda. Xususan, skvosh Aichi-Nagoya-2026 yozgi Osiyo va Los-Anjeles-2028 yozgi Olimpiya oʻyinlari dasturidan oʻrin olgan.

Tadbir davomida har ikki yoʻnalish boʻyicha professional sportchilar oʻz mahoratlarini namoyish qilib, yigʻilganlarni ushbu sport turlari bilan yaqindan tanishtirishdi.