O‘zbekiston delegatsiyasi Avstriya parlamentida iqtisodiy hamkorlik istiqbollarini muhokama qildi

Toshkent, O‘zbekiston (UzDaily.uz) — Vena shahrida bo‘lib o‘tgan uchrashuvlarda O‘zbekiston–Avstriya munosabatlarida yangi sahifa ochildi. O‘zbekiston Savdo-sanoat palatasi raisining birinchi o‘rinbosari Davronbek Kurbanov rahbarligidagi delegatsiya Avstriya Parlamentida samarali muloqotlar o‘tkazdi.

Muzokaralarda Avstriya Xalq demokratik partiyasi fraksiyasi rahbari Karl Renner va Avstriya Iqtisodiy palatasi aʼzosi Gunter Fexlindjer ishtirok etdi. Delegatsiyaga mamlakatimizning Avstriyadagi elchisi Baxtiyor Ibragimov hamrohlik qildi.

Suhbat avvalida D.Kurbanov tashrif davomida avstriyadagi biznesni qo‘llab-quvvatlovchi tashkilotlar vakillari bilan qator uchrashuvlar o‘tkazilganini, ular natijasida muhim kelishuvlarga erishilganini qayd etdi.

Karl Renner esa Avstriya parlamentarizmi tarixi va qonun chiqarish jarayoni haqida maʼlumot berdi. Shu bilan birga, u oxirgi yillarda O‘zbekistonda amalga oshirilayotgan iqtisodiy islohotlarni yuqori baholab, Avstriya tomonidan O‘zbekistonning Jahon savdo tashkilotiga aʼzo bo‘lish jarayoni qo‘llab-quvvatlanishini taʼkidladi.

Iqtisodiy hamkorlik masalalarida eng qiziqarli takliflardan biri Gunter Fexlindjerdan keldi. Uning takidlashicha, O‘zbekiston sifatli quruq mevalar eksportida katta imkoniyatlarga ega va bu mahsulotlar Avstriya bozorida yuqori talabga ega bo‘lishi mumkin.

O‘z navbatida, o‘zbek tomoni ushbu taklifni maʼqullab, O‘zbekiston Savdo-sanoat palatasi avstriyalik sheriklarga ishonchli mahalliy hamkorlar topish va loyihaviy masalalarni hal etishda ko‘mak berishga tayyorligini bildirdi.

Uchrashuv yakunida ikki tomonlama munosabatlarni yangi bosqichga olib chiqish maqsadida O‘zbekiston Savdo-sanoat palatasi, Avstriya Iqtisodiy palatasi va ikki davlat rasmiy idoralari savdo aylanmasini oshirish hamda iqtisodiy aloqalarni chuqurlashtirish bo‘yicha kelishib oldilar.