Toshkent, O‘zbekiston (UzDaily.uz) — O‘zbekiston Respublikasi Prezidenti Shavkat Mirziyoyev Xotira va qadrlash kuni, shuningdek, Ikkinchi jahon urushida qozonilgan G‘alabaning 80 yilligi munosabati bilan xalqimizga tabrik yo‘lladi.

Davlat rahbari o‘z tabrigida Ulug‘ G‘alabaning tarixiy ahamiyati, qahramon ajdodlar xotirasiga chuqur ehtiromi va bugungi kunda hayot bo‘lgan front va mehnat faxriylariga minnatdorligini izhor etdi.

«Bu — haqiqiy jasorat va qahramonlik solnomasi bo‘lib, uning ulug‘vorligi vaqt domida ham zabun bo‘lmaydi. Biz shonli g‘alabaga munosib hissa qo‘shgan sobitqadam xalqimiz bilan haqli ravishda faxrlanamiz», — deya taʼkidladi Prezident.

Urush yillarida respublikada yashagan qariyb 6,8 million aholidan 2 millionga yaqini frontga jo‘nab ketganini, ulardan yarim milliondan ortig‘i halok bo‘lganini, 50 mingdan ziyodi konslagerlarda qurbon bo‘lganini, minglab insonlar nogiron holda qaytganini eslatib o‘tdi. O‘zbekistonliklar hissasi yuzlab mukofotlar bilan eʼtirof etilgan: 301 nafar yurtdoshimiz Sovet Ittifoqi Qahramoni, 70 nafardan ortig‘i Shon-sharaf ordeni to‘liq kavaleri unvoniga sazovor bo‘lgan.

Prezident front ortidagi jasorat haqida alohida to‘xtalib o‘tdi:

«Urush yillarida O‘zbekiston front uchun ishonchli tayanchga aylangan — 171 ta zavod evakuatsiya qilingan, 280 ta yangi korxona barpo etilgan, shu bilan birga respublika 1,5 millionga yaqin evakuatsiya qilingan fuqaroni, jumladan 250 ming bolani samimiylik bilan qabul qilgan va boshpana bergan».

Shavkat Mirziyoyev avlodlar o‘rtasidagi bog‘liqlik haqida so‘z yuritar ekan, ajdodlar qahramonligini yodda saqlash va yoshlarimizni vatanparvarlik ruhida tarbiyalash muhimligini alohida taʼkidladi. Bu borada «G‘alaba bog‘i», “Vatanparvarlar” bog‘lari, hamda «Millat fidoyilari» yodgorlik majmuasi kabi ramziy inshootlar barpo etilgan bo‘lib, ularda yuzlab Vatan himoyachilari nomi oltin harflar bilan muhrlangan.

Prezident davlatning faxriylarga ko‘rsatayotgan eʼtiborini ham qayd etdi:

«G‘alabaning 80 yilligi munosabati bilan har bir urush qatnashchisi va nogironiga 10 ming AQSH dollari miqdorida bir martalik pul mukofoti, mehnat fronti ishtirokchilari va tenglashtirilgan toifalarga moddiy yordam va yubiley medallari topshirildi. Shuningdek, ularga tibbiy va ijtimoiy xizmatlar, sanatoriylarda davolanish imkoniyatlari yaratilmoqda».

«Biz bu buyuk insonlar oldida hamisha qarzdormiz. Ular hayotini ayamagan holda bugungi tinchlik va erkinlik uchun kurash olib borishgan», — dedi Prezident Mirziyoyev.

So‘nggi so‘zlarida u barcha fuqarolarni samimiy tabriklab, osoyishtalik, farovonlik va saodat tiladi:

«Yurtimizda hamisha tinchlik va xotirjamlik hukmron bo‘lsin, xalqimiz baxtli yashasin!»