Toshkent, O‘zbekiston (UzDaily.uz) — O‘zbekiston Respublikasi Adliya vazirligi hamda Singapur huquq vazirligi o‘rtasida 2025–2026-yillar uchun hamkorlik dasturi imzolandi.

Singapurda bo‘lib o‘tgan uchrashuvda O‘zbekiston Respublikasi adliya vaziri o‘rinbosari Sh. Rabiyev boshchiligidagi delegatsiya Singapur huquq vazirligi bilan muzokaralar olib bordi.

Uchrashuvda ikki davlat o‘rtasidagi hamkorlik aloqalari, 2021-yilda imzolangan o‘zaro Anglashuv memorandumi doirasida amalga oshirilgan ishlarga yuqori baho berildi hamda hamkorlikni yanada mustahkamlash masalalari muhokama qilindi.

2025-2026-yillar uchun yangi imzolangan Hamkorlik dasturi quyidagilarni qamrab oladi:

• yuridik kadrlarni qayta tayyorlash va malakasini oshirish;

• xalqaro tijorat nizolarini hal etish hamda Singapur Mediatsiya Konvensiyasi bo‘yicha tajriba almashish;

• davlatlar ishtirokidagi xalqaro nizolarda huquqiy himoya masalalari;

• huquq ustuvorligini ta’minlash bo‘yicha milliy va xalqaro tajriba;

• Singapur Huquqiy yordam byurosi va O‘zbekistonning “Madad” NNT faoliyatida tajriba almashish.

Mazkur dastur ikki mamlakat o‘rtasidagi huquqiy hamkorlikni yangi bosqichga olib chiqishi kutilmoqda.