O‘zbekiston va Xitoy ijtimoiy-iqtisodiy rivojlantirish sohasidagi hamkorlikni kengaytirish masalalarini muhokama qildi

Toshkent, O‘zbekiston (UzDaily.uz) — 12-sentabr kuni ISSV vakillari Xitoy Xalq Respublikasi Savdo vazirligi delegatsiyasi bilan uchrashdi.

Muzokaralar chog‘ida tomonlar ikki taraflama munosabatlarni mustahkamlashning ahamiyatini ta’kidlab, savdo-iqtisodiy va investitsiyaviy aloqalarning barqaror o‘sishi, shuningdek, texnik va beg‘araz yordam sohasida hamkorlikning kengayib borayotganini qayd etdilar.

Uchrashuvda ijtimoiy-iqtisodiy rivojlanishning asosiy yo‘nalishlarida hamkorlikni yanada chuqurlashtirish istiqbollari muhokama qilindi. Barqaror o‘sishni ta’minlash, innovatsiyalarni joriy etish, aholining farovonligini oshirish hamda zamonaviy chaqiriqlarga javob berishga qaratilgan tashabbuslar ko‘rib chiqildi.

Tomonlar ikki davlatning manfaatlarini inobatga olgan holda yangi hamkorlik yo‘nalishlarini ishlab chiqishga tayyor ekanliklarini bildirdilar.

Uchrashuv ishtirokchilari yuqori darajadagi muntazam muloqot qo‘shma loyihalarni kengaytirish, tajriba almashish va investitsiyalarni jalb etish uchun zamin yaratayotganini ta’kidladilar.

Erishilgan kelishuvlarni amaliyotga joriy qilish, aloqalarni qo‘llab-quvvatlash va hamkorlikning yangi shakllarini rivojlantirishga niyatlar borligi bildirildi.

Muzokaralar yakunida tomonlar o‘zaro manfaatli munosabatlarni yanada mustahkamlash, shuningdek, O‘zbekiston va Xitoy o‘rtasidagi strategik sheriklik hamda do‘stlikni rivojlantirishga tayyorligini qayd etdilar.