Toshkent, O‘zbekiston (UzDaily.uz) — O‘zbekistonning investitsiyaviy salohiyati va sanoat sohasidagi imkoniyatlari xalqaro hamkorlarni tobora ko‘proq jalb etmoqda. Shu kunlarda Investitsiyalar, sanoat va savdo vazirining birinchi o‘rinbosari N. Xolmurodov boshchiligidagi “O‘zcharmsanoat” uyushmasi delegatsiyasi Xitoy Xalq Respublikasida qator yirik kompaniyalar bilan muzokaralar olib bormoqda.

Delegatsiya a’zolari Xitoyning charm va yengil sanoat sohasidagi yetakchi kompaniyasi sanalgan “Guojian Zhanmao (Putian) Supply Chain Co., Ltd.” boshqaruvi raisi bilan bo‘lib o‘tgan uchrashuvda ikki tomonlama investitsiyaviy hamkorlik masalalarini muhokama qildi.

Uchrashuv chog‘ida Xitoy kompaniyasiga O‘zbekistonning to‘rt yirik hududi — Buxoro, Navoiy, Farg‘ona va Samarqand viloyatlarida yengil sanoat, xususan charm va to‘qimachilik mahsulotlari ishlab chiqarishga ixtisoslashgan zamonaviy sanoat parkini barpo etish taklifi ilgari surildi.

Xitoy kompaniyasining dastlabki rejalariga ko‘ra, 100 gektar yer maydonida 150 million dollarlik loyiha amalga oshirilishi ko‘zda tutilmoqda. Mazkur tashabbus nafaqat ishlab chiqarishni yo‘lga qo‘yish, balki butun hudud uchun markazlashgan sanoat xabi vazifasini bajarishi rejalashtirilgan.

Shuningdek, loyiha doirasida sanoat parkini barqaror energiya bilan ta’minlash maqsadida quyosh panellari ham o‘rnatilishi belgilangan. Bu nafaqat korxonaning ichki ehtiyojini qondirish, balki ortiqcha hajmni atrofdagi tashkilotlarga yetkazib berish imkonini ham yaratadi.

Shu tariqa, Xitoy kompaniyasi O‘zbekistonda amalga oshirishni rejalashtirayotgan loyiha nafaqat charm va to‘qimachilik tarmoqlarini qamrab oladi, balki ekologik jihatdan barqaror, yangi avlod industrial parki sifatida ham alohida ahamiyat kasb etadi.

“Guojian Zhanmao (Putian) Supply Chain Co., Ltd.” rahbariyati sentabr oyida O‘zbekistonga biznes missiya bilan tashrif buyurib, loyiha bo‘yicha huquqiy va texnik shartlarni mamlakat hukumati bilan batafsil kelishishini ma’lum qildi.

O‘zbekiston va Xitoy o‘rtasidagi sanoat kooperatsiyasi tobora mustahkamlanmoqda. Yangi sanoat parki loyihasi iqtisodiyotning muhim tarmoqlaridan biri bo‘lgan charm va to‘qimachilik sohasidagi quvvatlarni oshirish, hududlarda yangi ish o‘rinlari yaratish va mamlakatning eksport salohiyatini kengaytirishga xizmat qiladi.