Toshkent, O‘zbekiston (UzDaily.uz) — Xitoyda bo‘lib o‘tgan yirik savdo-iqtisodiy va investitsiyaviy forum O‘zbekiston–Xitoy o‘rtasidagi hamkorlikni yanada mustahkamlash yo‘lida muhim qadamlardan biri bo‘ldi. O‘zbekiston hukumati delegatsiyasi tarkibida “O‘zcharmsanoat” uyushmasi ham faol ishtirok etdi.

Forum doirasida “O‘zcharmsanoat” uyushmasi raisi Akbar Sultanov mamlakatimiz charm-poyabzal sanoatining ishlab chiqarish, investitsiyaviy va eksport salohiyatiga bag‘ishlangan maxsus taqdimot qildi. Ta’kidlanganidek, so‘nggi yillarda O‘zbekistonda charm sanoati tubdan modernizatsiya qilinib, xalqaro talab va standartlarga javob beradigan ishlab chiqarish quvvatlari yaratildi. Bugungi kunda respublikada yiliga millionlab juft poyabzal, yuzlab million kvadrat desimetr charm mahsulotlari ishlab chiqarilmoqda.

Sanoatning eksport salohiyati ham izchil oshib bormoqda – o‘zbek charm va poyabzal mahsulotlari nafaqat qo‘shni davlatlar, balki Yevropa, Turkiya, Xitoy va Janubi-Sharqiy Osiyo bozorlarida o‘z o‘rnini topmoqda.

Taqdimotda, shuningdek, respublikamizdagi kichik sanoat zonalari (KSZ) faoliyati haqida ham batafsil ma’lumot berildi. Sultanov Xitoy kompaniyalariga bu hududlarda xorijiy investorlar uchun yaratilgan shart-sharoitlarni tanishtirdi. Jumladan:

• to‘liq tayyor infratuzilma,
• soliq va bojxona imtiyozlari,
• tezkor ro‘yxatga olish va yer maydoni ajratish imkoniyatlari,
• davlat tomonidan qo‘llab-quvvatlash dasturlari.

Bu imkoniyatlar Xitoy kompaniyalari uchun qo‘shma loyihalarni amalga oshirish va ishlab chiqarishni tezda yo‘lga qo‘yish uchun katta qulaylik yaratadi. Forum yakunida tomonlar O‘zbekiston charm-poyabzal sanoatida o‘zaro hamkorlikni kengaytirish masalalarini muhokama qildi. Xitoy kompaniyalari mamlakatimizdagi ishlab chiqarish klasterlari, xomashyo bazasi va eksport bozorlariga chiqish imkoniyatlarini yuqori baholadi.

“O‘zcharmsanoat” uyushmasining ishtiroki natijasida charm sanoatida qo‘shma investitsion loyihalar, zamonaviy texnologiyalarni joriy etish va xalqaro savdo aloqalarini kengaytirishga qaratilgan yangi tashabbuslar muhokama qilindi. Forum yakunlari shuni ko‘rsatdiki, O‘zbekiston charm sanoati xalqaro hamkorlar uchun ishonchli va istiqbolli yo‘nalish bo‘lib, Xitoy bilan sheriklik aloqalari yanada mustahkamlanmoqda.