Sog‘liqni saqlash sohasida O‘zbekiston – Fransiya hamkorligi kengaymoqda

Toshkent, O‘zbekiston (UzDaily.uz) — O‘zbekiston Savdo-sanoat palatasi raisi o‘rinbosari Dilshod Rasulov Fransiya Tashqi ishlar vazirligining sog‘liqni saqlash sohasidagi eksport bo‘yicha maxsus vakili Jorj-Fabris Blyum hamda «French Healthcare» assotsiatsiyasi delegatsiyasi bilan uchrashuv o‘tkazdi.

Tadbirda, shuningdek, SSP raisi maslahatchisi Alisher Shayxov va bir qator xususiy klinikalar vakillari ishtirok etdi.

Suhbatda qo‘shma loyihalarni amalga oshirish, fransuz kompaniyalarining investitsiyaviy ishtiroki, zamonaviy tibbiy uskunalar va telemeditsina yo‘nalishlarini joriy qilish, kadrlar tayyorlash masalalari muhokama qilindi.

Tibbiy turizm salohiyati alohida qayd etildi — O‘zbekiston sifatli xizmat va maqbul narxlar tufayli mintaqadagi bemorlar uchun tobora jozibador yo‘nalishga aylanmoqda. Bu esa fransuz shifokorlarini mahalliy klinikalar bazasida qo‘shma amaliyotlarga jalb etish imkonini yaratadi.

Fransuz delegatsiyasi tibbiy assotsiatsiyalar o‘rtasida to‘g‘ridan-to‘g‘ri hamkorlik o‘rnatish, o‘zbek shifokorlarini Fransiyaning yetakchi klinikalarida malaka oshirish va tibbiy sug‘urta tizimiga zamonaviy yechimlarni joriy etishga qiziqish bildirdi.

Uchrashuv yakunida tomonlar biznes hamkorlikni chuqurlashtirish, klinikalar o‘rtasida tajriba almashish va qo‘shma innovatsion loyihalarni amalga oshirishda o‘zaro manfaatdor ekanini tasdiqladilar.