Ummataliyev fransiyalik Sezarni mag‘lub etdi

Toshkent, O‘zbekiston (UzDaily.uz) — Javohir Ummataliyev 80 kg vazn toifasida Liverpul shahrida o‘tayotgan boks bo‘yicha jahon chempionatida O‘zbekiston terma jamoasiga uchinchi oltin medalni olib keldi.

Final jangda 20 yoshli o‘zbek boksiyeri 21 yoshli fransiyalik Yojerlen Sezarga qarshi ringga ko‘tarildi.

Birinchi raunddayoq Ummataliev tashabbusni o‘z qo‘liga oldi va raqibini nokautga uchratib, raundni ishonchli g‘alaba bilan yakunladi.

Ikkinchi raundda Sezar jangning borishini o‘zgartirishga urindi, ammo Ummataliyev uning hujumlarini neytrallashtirib, yana ustunlikni qo‘lda saqlab qoldi.

So‘nggi raundda o‘zbek sportchisi to‘liq ustunlik qilib, uchrashuvni munosib g‘alaba bilan yakunladi.

Shu tariqa, O‘zbekiston terma jamoasi hisobida Liverpuldagi jahon chempionatida uchta oltin va uchta bronza medali mavjud.