XII–XIII asrlarga oid noyob artefakt Londondan O‘zbekistonga qaytarilmoqda

Toshkent, O‘zbekiston (UzDaily.uz) — XII–XIII asrlarda yaratilgan gulbarg shaklidagi qo‘rg‘oshin idish London galereyasidan O‘zbekistonga qaytariladi, deya xabar berdi mamlakat Islom sivilizatsiyasi markazi matbuot xizmati.

Markaz maʼlumotiga ko‘ra, ushbu artefakt G‘aznaviylar davriga tegishli bo‘lib, hozirda Londondagi Orpheus galereyasida saqlanmoqda. «Ushbu nodir topilma, nihoyat, Londondan yurtimizga qaytmoqda», — deyiladi matbuot xizmatining bayonotida.

Maʼlum qilinishicha, o‘sha davrda bunday idishlar keng qo‘llanib, marosimiy udumlar jarayonida ham, uy-joylarni bezashda ham ishlatilgan.

So‘nggi yillarda O‘zbekiston yo‘qotilgan madaniy boyliklarni qaytarish va ularning noqonuniy olib chiqilishiga qarshi kurashish bo‘yicha faol ishlar olib bormoqda.

Joriy yil iyul oyida Islom sivilizatsiyasi markazi Sotheby‘s va Christie‘s auksionlarida islom madaniyati va mamlakat tarixi bilan bog‘liq bo‘lgan, uzoq vaqt xususiy kolleksiyalar hamda xorijiy muzeylarda saqlanib kelgan qator relikviyalarni sotib olgani haqida maʼlum qilgan edi.