Toshkent, O‘zbekiston (UzDaily.uz) — Xitoy Elektronika Savdo Palatasi (CECC) prezidenti Van Ning boshchiligidagi delegatsiya “O‘zeltexsanoat” uyushmasi mas’ul xodimlari hamrohligida “Eltech Industrial” texnoparkiga tashrif buyurdi. Mehmonlar texnoparkdagi yirik ishlab chiqarish quvvatlari, zamonaviy texnologiyalar hamda investorlar uchun yaratilgan qulayliklar bilan tanishdilar.

Tashrif davomida delegatsiya a’zolariga texnopark rezidentlari uchun taqdim etilayotgan soliq va bojxona imtiyozlari, infratuzilma imkoniyatlari, innovatsion hamkorlik sharoitlari haqida batafsil ma’lumot berildi.

“O‘zeltexsanoat” uyushmasi vakillari CECC a’zolariga texnoparkka a’zo bo‘lish va rezident sifatida qo‘shilish orqali o‘zaro manfaatli hamkorlikni yo‘lga qo‘yish bo‘yicha takliflarni taqdim etdilar. Uchrashuv doirasida tomonlar bu yo‘nalishda aniq tashabbuslarni amalga oshirishga tayyor ekanliklarini bildirdilar.

Mazkur tashrif O‘zbekiston va Xitoy o‘rtasida elektronika, energetika hamda yuqori texnologiyalar sohalaridagi hamkorlikni kengaytirish va “Eltech Industrial” texnoparkining xalqaro miqyosdagi nufuzini yanada oshirishga xizmat qiladi.