Toshkent, O‘zbekiston (UzDaily.uz) — Xitoyning Pekin shahrida "O‘zbekiston – Xitoy" savdo-iqtisodiy va investitsiya forumi bo‘lib o‘tmoqda. Forumda Farmatsevtika tarmog‘ini rivojlantirish agentligi direktori A.Azizov boshchiligidagi delegatsiya ham ishtirok etib, bir qator uchrashuvlar o‘tkazdi.

China Meheco Group Co., Ltd bilan uchrashuvda:

O‘zbekistonning farmatsevtika sohasidagi imkoniyatlari, farmatsevtika erkin iqtisodiy zonalardagi yaratilgan sharoitlar va mahalliy ishlab chiqarishni rag‘batlantirishga qaratilgan takliflar bilan tanishtirildi;

O‘zbekistonda insulin, substansiyalar va oraliq aralashmalar ishlab chiqarish istiqbollari muhokama qilindi;

Xitoy kompaniyasi tomonidan O‘zbekistonlik farmatsevtika mutaxassislarini Xitoyda o‘qitish va tajriba almashish takliflari berildi.

China National Biotec Group Co. Limited (Sinopharm) bilan muzokaralarda:

O‘zbekistonda turli kasalliklarga qarshi vaksinalar ishlab chiqish loyihasi;

Mahalliy hamkorlarni aniqlash, qo‘shma ishlab chiqarish quvvatlarini tashkil etish va sarmoya kiritish imkoniyatlari muhokama qilindi.

Tyanszin fan va texnologiya universiteti tadbirkorlik texnologiyalari markazi raisi Chjan Baovei bilan uchrashuvda O‘zbekistonga Xitoy farmatsevtika kompaniyalarini jalb etish, laboratoriyalarni jihozlash va asbob-uskunalar bilan taʼminlash masalalari ko‘rib chiqildi. Loyihalar Xitoy grantlari asosida amalga oshirilishi rejalashtirilmoqda.