Saida Mirziyoyeva kichik biznes uchun yangi imtiyozlarni izohladi

Toshkent, O‘zbekiston (UzDaily.uz) — O‘zbekiston Prezidenti Administratsiyasi rahbari Saida Mirziyoyeva kichik biznes subyektlari uchun yana-da qulay iqtisodiy va maʼmuriy shart-sharoitlar yaratishga qaratilgan prezident farmoni yuzasidan munosabat bildirdi. U bu haqda o‘zining Telegram-kanalida maʼlum qildi.

Uning so‘zlariga ko‘ra, so‘nggi kunlarda biznes muhiti vakillari kichik biznes yuritish shartlarini yengillashtirishga qaratilgan choralarni ijobiy baholamoqda.

«Muammo ancha vaqtdan beri dolzarb edi. Hududlarga safarlar vaqtida tadbirkorlar doim qo‘shilgan qiymat solig‘iga o‘tish uchun belgilangan bir milliard so‘mlik chegara juda pastligi, soliq maʼmurchiligi murakkabligi, tekshiruvlar va hisobotlar soni ortiqchaligi haqida gapirishardi. Natijada biznes xotirjam rivojlanish o‘rniga sunʼiy ravishda bo‘linib ketmoqda», — dedi Mirziyoyeva.

Shuningdek, u yangi prezident farmoniga muvofiq qo‘shilgan qiymat solig‘ini to‘lashga o‘tish uchun minimal chegara 1 milliard so‘mdan 5 milliard so‘mga oshirilganini maʼlum qildi.

Uning baholashicha, qabul qilingan qarorlar samarasini birinchi navbatda oilaviy korxonalar, kafe va do‘konlar, servis kompaniyalari hamda kichik biznes sohasida faoliyat yuritayotgan keng doiradagi tadbirkorlar his qiladi.