Тошкент, Ўзбекистон (UzDaily.uz) — 8 май куни Жанубий Фарғона каналининг сув сатҳи кўтарилиши натижасида Андижон вилояти Бувайда туманидаги қатор маҳаллаларда сув тошқини рўй берди.

Ўзгидромет маълумотларига кўра, мазкур тошқин натижасида жами 560 та хонадон зарар кўрди.

Ҳодиса жойида оқибатларни бартараф этиш бўйича ишлар зудлик билан бошлаб юборилди.

Дастлабки маълумотларга кўра, аҳоли орасида жабрланувчилар қайд этилмаган, моддий зарар бўйича маълумотлар аниқлаштирилмоқда.

Вазият муносабати билан "Ўзбекгидроэнерго" АЖ Жанубий Фарғона магистрал канали бош қисмидан сув олиш тўлиқ тўхтатилганини маълум қилди.

Ҳозирги вақтда масъул хизматлар аҳоли хавфсизлигини таъминлаш ва сув оқимларининг тўсиқсиз ўтиб кетишини таъминлаш мақсадида барча зарур чораларни кўрмоқда.

Ҳудудий ҳокимликлар, қутқарув хизмати ва коммунал хизматлар зарар кўрган ҳудудларда вазиятни барқарорлаштириш учун ҳаракатларини мувофиқлаштирмоқда.

Фавқулодда вазиятлар вазирлиги матбуот хизмати маълум қилишича, ҳозирда Жанубий Фарғона каналини ёрилиши оқибатида тахминан 100 та хонадонга сув кирган.

Шундан 30 та уйнинг ичкарисига сув кирган бўлса, 70 та ҳолатда сув ҳовли ерларига етиб борган.

Ҳозирги пайтда ФВВ томонидан ҳодиса оқибатларини бартараф этиш ишлари давом эттирилмоқда.