Тошкент, Ўзбекистон (UzDaily.uz) — Дубайда ўзбекистонлик фуқаролар иштирокида содир бўлган фожиали воқеа юзасидан тергов ишлари давом этмоқда. Янги маълумотларга кўра, ҳодиса натижасида икки киши ҳалок бўлган.

Khaleej Times нашри хабар беришича, жанжал шахсий тусга эга бўлиб, у автозаправка шохобчасида рўй берган. Илгари бир-бирини танийдиган икки гуруҳ ўртасида келиб чиққан тортишув оммавий муштлашувга айланиб кетган.

Ҳодиса шундай содир бўлган: жабрланувчилардан бири ўзининг автомобилининг шиналарини ҳаво билан тўлдириш учун автозаправкага келган. У қизил рангли Mercedesдан тушган заҳоти ҳужумчилар гуруҳи томонидан уриб туширилган. Иккинчи жабрланувчи эса қочиб кетишга уринган, аммо бошқа гуруҳ томонидан қувиб етилиб, оғир жароҳат олган ва ҳалок бўлган.

Воцеа гувоҳи бўлган полиция ходими воқеа жойи яқинида бўлиб, зудлик билан тегишли идораларга хабар берган. Дубай полицияси тезкор равишда воқеа жойига етиб бориб, ҳудудни ўраб олган ва далиллар йиғилишини бошлаган.

Кузатув камералари ёзувлари ва гувоҳларнинг сўзларига асосланиб, воқеалар занжири ва унда иштирок этган шахслар аниқланган. Олиб борилган тадбирлар натижасида ҳужумни ташкил этган деб гумон қилинаётган шахслар ҳамда яна 11 киши қўлга олинган. Улар қўшни амирликдаги меҳмонхоналардан бирида топилган.

Тергов пайтида қўлга олинганлар воқеада иштирок этганини тан олиб, бунга узоқ йиллик шахсий келишмовчиликлар сабаб бўлганини билдирган.

Маҳаллий ҳокимиятлар таъкидлашича, мазкур иш хусусий ва сиёсий характерга эга эмас. Ҳозирда жиноят иши бўйича материаллар Дубай прокуратурасига топширилган.