Тошкент, Ўзбекистон (UzDaily.uz) — 2025 йилнинг биринчи чорагида Ўзбекистон аҳолисига берилган кредитлар ҳажми 34,9 триллион сўмни ташкил этди, бу эса 2024 йилнинг шу даврига нисбатан 74% кўп. Бу ҳақда Марказий банк ҳисоботида қайд этилган.

Ўтган йил охиригача кузатилган пасайишдан сўнг, жорий йилда динамика ўзгариб, кредит қолдиқларининг ўсиш суръатида ўртача тезлашув кузатилмоқда. 2025 йил март ойи якунида ўсиш 21,1% ни ташкил этди, бу эса йил бошига нисбатан 1,7 фоиз пунктга юқори.

Жами кредит портфели ўсишига микрозаймлар, микрокредитлар ва ипотека ссудалари асосий таъсир кўрсатди. Шу билан бирга, автокредитлаш ҳажми пасайишда давом этмоқда ва 2,4% ни ташкил этди.

Кредитлаш ҳажмининг ўсиши аҳоли даромадларининг кўпайиши билан боғлиқ бўлиб, бу эса истеъмол ва ипотека кредитларига талабнинг ортишига олиб келди. Уч ой давомида берилган кредитлар тузилмасида микрозаймлар 53,6%, микрокредитлар 15,6%, ипотека 12,8%, автокредитлар 10%, бошқа турдаги кредит маҳсулотлари эса 8% ни ташкил этди.

2024 йилнинг биринчи чораги билан солиштирилганда, микрозаймлар ҳажми 2,3 баробарга, микрокредитлар — 1,9 баробарга, кредит карталари орқали берилган маблағлар 3,3 баробарга ошди. Ипотека кредитлаш ҳажми 26,3% га кўпайди, автокредит бериш эса 17,6% га камайди.

Марказий банк шуни таъкидлайдики, аҳолини кредитлаш ҳажмининг бунчалик тез кенгайиши келгусида уларнинг молиявий барқарорлиги учун хавф-хатарлар туғдириши мумкин.