Тошкент, Ўзбекистон (UzDaily.uz) — 2025 йил 24 апрелда Вашингтонда Жаҳон банки гуруҳи ва Халқаро валюта жамғармасининг йиллик баҳорги учрашувлари доирасида Ўзбекистон Республикаси Бош вазири ўринбосари – Иқтисодиёт ва молия вазири Жамшид Қўчқоров ҳамда Осиё инфратузилмавий инвестициялар банки (ОИИБ) президенти Сзин Литсюн ўртасида музокаралар ўтказилди. 

Музокаралар давомида Ўзбекистонда муҳим инфратузилмавий лойиҳаларни амалга ошириш доирасидаги икки томонлама ҳамкорлик масалаларига алоҳида эътибор қаратилди. Сув таъминоти ва оқава сувларни бошқариш тизимларини ривожлантириш, йўл инфратузилмасини модернизация қилиш, энергетика соҳасини такомиллаштириш ҳамда таълим муассасаларини модернизация қилиш масалалари асосий йўналишлар қаторига киритилди.

Учрашув натижасида томонлар Ўзбекистоннинг инфратузилма салоҳиятини ривожлантириш, узоқ муддатли иқтисодий ўсишни рағбатлантириш ва минтақавий барқарорликни таъминлашга қаратилган ҳамкорликни мустаҳкамлашдан манфаатдор эканликларини тасдиқлади.