Тошкент, Ўзбекистон (UzDaily.uz) — 2025 йил 25 апрель куни Олмаота шаҳрида Ўзбекистоннинг сайёҳлик салоҳияти тақдимоти ўтказилди. Тадбирда икки мамлакат сайёҳлик соҳасининг етакчи вакиллари, дипломатлар, мутахассислар ва тадбиркорлик доиралари иштирок этиб, туризмни ривожлантириш истиқболлари, ҳамкорликнинг янги йўналишлари ҳамда маданий ва тарихий меросни тарғиб қилиш имкониятларини муҳокама қилдилар.

Тадбирни Ўзбекистоннинг Қозоғистондаги элчиси Бахтиёр Ибрагимов кириш сўзи билан очиб, икки давлат ўртасидаги сайёҳлик соҳасидаги ҳамкорликни мустаҳкамлаш муҳимлигини таъкидлади ва Ўзбекистоннинг бой маданий меросини халқаро туризмни ривожлантириш учун асос сифатида эътироф этди.

Туризм қўмитаси вакиллари мамлакатимиз ҳудудларининг сайёҳлик салоҳияти ҳақида маълумот берди. Инфратузилмани ривожлантириш, ички туризмни қўллаб-қувватлаш ва халқаро бозорга мўлжалланган янги сайёҳлик маҳсулотларини яратишга алоҳида эътибор қаратилди. Меҳмонларга Самарқанд, Бухоро ва Хиванинг жаҳонга машҳур тарихий ёдгорликлари, шунингдек, замонавий туризм инфратузилмаси объектлари, экологик ва гастрономик туризм имкониятлари ҳақидаги видеолавҳа намойиш этилди.

Тадбир доирасида B2B учрашувлари ташкил этилди. Унда қўшма саёҳатлар муҳокама қилинди, тажриба алмашилди ва янги ҳамкорлик алоқалари ўрнатилди.