Тошкент, Ўзбекистон (UzDaily.uz) — 2025 йил май ойи якунларига кўра, Ўзбекистонда хорижий сайёҳлар сони бўйича янги рекорд қайд этилди — республикага тахминан 1,1 миллион турист келган. Бу кўрсаткич апрел ойи натижаларидан ҳам юқори бўлиб, ўшанда мамлакат тарихида илк бор 1 миллиондан ортиқ хорижий меҳмон қайд этилган эди.

Бундай ижобий ўсиш туризм соҳасида изчил амалга оширилаётган ислоҳотлар самарасидир. Яратилган қулай шарт-шароитлар туфайли Ўзбекистон халқаро туристик жамоатчилик учун борган сари очиқ ва жозибадор мамлакатга айланмоқда.

Бу соҳадаги ривожланиш Ўзбекистон Республикаси Президентининг туризмни қўллаб-қувватлаш ва ривожлантиришга қаратилган фармон ва қарорлари асосида амалга оширилаётган кенг кўламли чора-тадбирлар билан боғлиқ. Уларнинг орасида энг устувор йўналишлар — инвестицияларни фаол жалб этиш, визасиз режимни кенгайтириш, шунингдек, халқаро туристик кўргазма ва форумларда иштирок этишдир.

Келгусида туристик инфратузилмани модернизация қилиш, хизматлар сифати ва турини кенгайтириш, шунингдек, Ўзбекистоннинг жаҳон туризм бозорида ўзига хос ва рақобатбардош йўналиш сифатидаги нуфузини мустаҳкамлаш бўйича ишлар давом эттирилади.