Тошкент, Ўзбекистон (UzDaily.uz) — Россия Федерацияси Ҳукуматининг Раис ўринбосари Александр Новак расмий иш сафари билан Ўзбекистон Республикасида бўлди.

Президент Шавкат Мирзиёев билан ўтказилган учрашув чоғида томонлар нефть-газ, кўмир, энергетика, атом энергетикаси, молия-банк соҳалари, шунингдек, юқори технологияли лойиҳалар ва саноатда ҳамкорликни кенгайтириш истиқболларини муҳокама қилдилар.

Александр Новак қуйидагиларни таъкидлади:
«Россия ва Ўзбекистон ўртасидаги муносабатлар тенг ҳуқуқлилик, ўзаро hurмат ва манфаатларни инобатга олиш принципларига асосланган бўлиб, ҳар томонлама стратегик шериклик ва иттифоқчиликни англатади. Россия Ўзбекистондаги кенг кўламли иқтисодий ислоҳотлар, жадал иқтисодий ўсиш ва мамлакатнинг минтақавий ҳамда халқаро миқёсдаги нуфузининг мустаҳкамланишини фахр билан кузатмоқда.»

IV Тошкент халқаро инвестиция форуми доирасида вице-премьер Новак сўнгги уч йилда Россия компаниялари 5 миллиард доллардан зиёд инвестициявий шартномалар имзолаганини маълум қилди. Шунингдек, у шундай деди:
«Осиё мамлакатлари Россиянинг асосий савдо ҳамкорлари ҳисобланади. Ўзбекистон билан савдо алоқалари жадал ривожланмоқда: сўнгги тўрт йил ичида ўзаро товар айирбошлаш ҳажми икки баробарга ошиб, 10 миллиард доллардан ошди. Россия ва Ўзбекистон президентлари бу кўрсаткични яқин йилларда 30 миллиард долларга етказиш вазифасини қўйганлар.»

Александр Новакнинг сўзларига кўра, ВЭБ.РФ ривожланиш корпорацияси 13,1 миллиард доллар, Россия экспорт маркази эса 3,8 миллиард доллар сармоя киритган.
«Ишончим комилки, жорий йилда ҳам таассуротли натижаларга эришилади», — дея қайд этди вице-премьер Тошкентдаги инвестиция форумининг пленар сессиясида.