Тошкент, Ўзбекистон (UzDaily.uz) — Қирғизистон Президенти Садир Жапаров Марказий Осиё давлатлари учун ягона виза жорий этиш ташаббуси билан чиқди. Бу ҳақда у ўзининг Facebook'даги саҳифасида маълум қилди.

Давлат раҳбарининг таъкидлашича, Қирғизистон ва Тожикистон 101 йил давомида ҳал этилмай қолган чегара масаласини тўлиқ ҳал этди. Унинг сўзларига кўра, бу бутун минтақа учун тарихий воқеа ҳисобланади, чунки энди барча Марказий Осиё давлатлари чегараларни делимитация қилиш жараёнини якунлади.

Шу муносабат билан Жапаров минтақада визасиз режим яратишни таклиф қилди. Шунингдек, хорижий фуқаролар учун Европа Иттифоқининг Шенген визасига ўхшаш ягона виза тизимини жорий этиш таклиф қилинди. Бу уларга Марказий Осиёнинг барча давлатлари бўйлаб эркин ҳаракатланиш имконини беради.