Тошкент, Ўзбекистон (UzDaily.uz) — Тошкентда франчайзинг дастури доирасида очилган янги "SEG TASCO" ёқилғи қуйиш шохобчаси иш бошлади.

Бу ,бренднинг франшиза модели бўйича ишлайдиган учинчи объекти бўлиб, бир вақтнинг ўзида P Oil Group компанияси билан ҳамкорликда амалга оширилган биринчи лойиҳа ҳисобланади. Станция Сергели туманида жойлашган бўлиб, автомобиль ҳайдовчилари учун тўлиқ замонавий хизматларни таклиф этади.

Янги АЁҚШда барча оммабоп ёқилғи турлари: АИ-80, АИ-92, АИ-95 ва АИ-98 тақдим этилган.

"Санег шўба корхонаси SEG TASCO учун Тошкентда учинчи франшиза ёқилғи қуйиш шохобчасининг ишга туширилиши чакана савдо тармоғини ривожлантириш йўлидаги изчил қадамдир. Ишончли ҳамкорлар билан биргаликда биз асосий минтақалардаги иштирокимизни кенгайтиришда давом этмоқдамиз.

Бугунги кунда компания Saneg бренди остида 18 та ёқилғи қуйиш шохобчаси ва 13 та автомобилларга газ тўлдириш компрессор станциясини бошқариб, сифатли ёқилғи ва замонавий хизматни аҳолига тақдим этмоқда", – дея таъкидлади SEG TASCO/Saneg АЁҚШ ва АГТКС департаменти бошлиғи Шоҳжаҳон Аҳмедов.

Биринчи "SEG TASCO" франшиза АЁҚШ Миробод туманида, иккинчиси Олмазор туманида очилган. Пойтахтнинг Сергели туманидаги  янги объект тармоқни кенгайтириш ва чакана савдо инфратузилмасини ривожлантириш йўлидаги навбатдаги қадамга айланди.