Соғлиқни сақлаш соҳасида Ўзбекистон – Франция ҳамкорлиги кенгаймоқда

Тошкент, Ўзбекистон (UzDaily.uz) — Ўзбекистон Савдо-саноат палатаси раиси ўринбосари Дилшод Расулов Франция Ташқи ишлар вазирлигининг соғлиқни сақлаш соҳасидаги экспорт бўйича махсус вакили Жорж-Фабрис Блюм ҳамда «French Healthcare» ассоциацияси делегацияси билан учрашув ўтказди.

Тадбирда, шунингдек, ССП раиси маслаҳатчиси Алишер Шайхов ва бир қатор хусусий клиникалар вакиллари иштирок этди.

Суҳбатда қўшма лойиҳаларни амалга ошириш, француз компанияларининг инвестициявий иштироки, замонавий тиббий ускуналар ва телемедицина йўналишларини жорий қилиш, кадрлар тайёрлаш масалалари муҳокама қилинди.

Тиббий туризм салоҳияти алоҳида қайд этилди — Ўзбекистон сифатли хизмат ва мақбул нархлар туфайли минтақадаги беморлар учун тобора жозибадор йўналишга айланмоқда. Бу эса француз шифокорларини маҳаллий клиникалар базасида қўшма амалиётларга жалб этиш имконини яратади.

Француз делегацияси тиббий ассоциациялар ўртасида тўғридан-тўғри ҳамкорлик ўрнатиш, ўзбек шифокорларини Франциянинг етакчи клиникаларида малака ошириш ва тиббий суғурта тизимига замонавий ечимларни жорий этишга қизиқиш билдирди.

Учрашув якунида томонлар бизнес ҳамкорликни чуқурлаштириш, клиникалар ўртасида тажриба алмашиш ва қўшма инновацион лойиҳаларни амалга оширишда ўзаро манфаатдор эканини тасдиқладилар.