Тошкент, Ўзбекистон (UzDaily.uz) — Тошкент халқаро инвестиция форуми – 2025 (ТМИФ-2025) доирасида умумий қиймати 30,5 миллиард АҚШ долларига тенг инвестициявий ва савдо шартномалари ҳамда келишувлар имзоланди.

Жорий йилда 9–12 июнь кунлари пойтахтнинг турли майдонларида бўлиб ўтган форум минтақа миқёсидаги энг йирик тадбирга айланди.

Форумда 8 мингдан зиёд иштирокчи қатнашди, шундан 3 мингга яқини хорижий меҳмонлар бўлиб, улар 97 та давлатни вакиллик қилди. Делегатлар орасида 450 нафар юқори мартабали меҳмон, жумладан, 312 нафар ҳукумат идоралари вакиллари бор эди.

Тўрт кун давомида ўтказилган 36 та панел сессияси форумнинг асосий мазмунли қисмларидан бири бўлди. Уларда дунё бўйлаб таниқли халқаро инвесторлар, иқтисодчилар ва расмийлардан иборат 150 нафардан ортиқ спикер иштирок этди.

Бу йилги форумнинг муҳим янгиликларидан бири — Ўзбекистоннинг ишлаб чиқариш салоҳиятини намоён этувчи йирик саноат кўргазмаси бўлди. 12 минг квадрат метр майдонда 100 та маҳаллий ишлаб чиқарувчи ўз маҳсулотлари, инновацион ишланмалари ва лойиҳаларини намойиш қилди. Кўргазмада электротехника, фармацевтика, озиқ-овқат ва тўқимачилик саноати, машинасозлик, металлургия, энергетика, автомобилсозлик, кимё, молиявий хизматлар, туризм ва ахборот технологиялари каби соҳалар қамраб олинди.

Кўргазма ҳар куни 2 мингдан ортиқ ташриф буюрувчиларни қабул қилди. Унинг доирасида B2B ва B2G форматларида 500 дан ортиқ бизнес учрашувлар бўлиб ўтди, бу эса Ўзбекистон ва хорижий компаниялар ўртасида янги ташаббусларни муҳокама қилиш ва ҳамкорлик ўрнатиш учун майдончага айланди.