Тошкент, Ўзбекистон (UzDaily.uz) — Uzbekistan Airports ширкатида Осиё тараққиёт банки (ОТБ)нинг авиация бўйича маслаҳатчиси Брендан Соби билан учрашув бўлиб ўтди. Унинг ташрифи Ўзбекистонда транспорт соҳасини рақамлаштиришни илгари суришга қаратилган техник миссия доирасида амалга оширилди.

Учрашувда Uzbekistan Airports вакиллари томонидан IT-инфратузилмани модернизация қилиш ва аэропортлар бошқарув жараёнларига рақамли технологияларни жорий этиш бўйича амалга оширилган лойиҳалар тақдим этилди. Асосий операцияларни автоматлаштириш, интеллектуал видео кузатув ва кириш-чиқиш назорати тизимлари, йўловчиларни рақамли рўйхатдан ўтказиш, шунингдек, ягона IT-архитектура яратишда эришилган натижалар батафсил ёритилди.

Алоҳида эътибор 2025–2030 йилларга мўлжалланган Uzbekistan Airports рақамли трансформация стратегияси тақдимотига қаратилди. Ушбу ҳужжат компаниянинг асосий устувор йўналишларини белгилайди, жумладан мижозлар ва ишлаб чиқариш хизматларини рақамлаштириш, давлат рақамли платформалари билан интеграция, интеллектуал ечимларни жорий этиш, IT-инфратузилмани ривожлантириш ва киберхавфсизлик даражасини ошириш.

ОТБ маслаҳатчисининг ташрифи ва ўзаро тажриба алмашуви авиация соҳасини технологик модернизация қилиш ва халқаро ҳамкорликни чуқурлаштириш йўлида муҳим қадам бўлди.