Uzautotrans 8 iyundan Toshkent–Cho‘lponota reysini yo‘lga qo‘yadi

Toshkent, O‘zbekiston (UzDaily.uz) — 8 iyundan boshlab Uzautotrans Service kompaniyasi Toshkent – Cho‘lponota (Issiqko‘l ko‘li) yo‘nalishi bo‘yicha mavsumiy avtobus qatnovini yo‘lga qo‘yadi. Bu haqda O‘zbekiston Transport vazirligi matbuot xizmati xabar qildi.

Marshrut turistik mavsum davomida Toshkent shahri bilan Cho‘lponota kurort hududi o‘rtasida yo‘lovchilarga xizmat ko‘rsatadi. Reyslar “Toshkent” avtovokzalidan juft sanalarda, Cho‘lponotadan qaytish reyslari esa toq sanalarda amalga oshiriladi.

Avtobuslarning Toshkentdan jo‘nashi soat 15:00 ga belgilangan. Yo‘lovchi tashish xizmatlari kompaniya tasarrufidagi Yutong rusumli avtobuslarda amalga oshiriladi.

Ushbu yo‘nalish bo‘yicha chipta narxi 365 ming so‘mni tashkil etadi.