Istanbulda 6 yoshli O‘zbekiston fuqarosi halok bo‘ldi

Toshkent, O‘zbekiston (UzDaily.uz) — 2026 yil 8 iyun kuni Istanbul shahrining Fotih tumanida, Laleli tramvay bekati hududida baxtsiz hodisa sodir bo‘lib, uning oqibatida O‘zbekiston Respublikasining 6 yoshli fuqarosi halok bo‘ldi.

O‘zbekistonning Istanbul shahridagi Bosh konsulxonasi maʼlumotiga ko‘ra, bola Turkiyada ota-onasi va yaqinlari bilan turist sifatida bo‘lgan.

Dastlabki maʼlumotlarga ko‘ra, tramvaydan tushganidan so‘ng voyaga yetmagan bola bekat platformasi bilan tramvay yo‘llari orasida qisilib qolgan va transport vositasi harakati natijasida og‘ir jarohat olgan. U voqea joyida vafot etgan.

Hozirgi vaqtda Turkiya huquqni muhofaza qiluvchi organlari hodisa holatlari yuzasidan tergov olib bormoqda.

O‘zbekiston Respublikasining Istanbul shahridagi Bosh konsulxonasi halok bo‘lgan bolaning oilasi va yaqinlariga chuqur taʼziya bildirdi. Shuningdek, konsullik xizmatlari zarur konsullik-huquqiy yordam ko‘rsatish choralarini ko‘rayotgani maʼlum qilindi.

Murojaatda taʼkidlanishicha, Istanbuldagi transport infratuzilmasi xususiyatlari va harakat yuqori darajada ekanini inobatga olgan holda fuqarolarga voyaga yetmaganlarning xavfsizligiga alohida eʼtibor qaratish va bolalarni nazoratsiz qoldirmaslik tavsiya etilgan.