Botkenda O‘zbekiston chegarasida yangi post ochildi

Toshkent, O‘zbekiston (UzDaily.uz) — Qirg‘izistonning Botken tumanidagi Sogment qishlog‘ida Qirg‘iziston–O‘zbekiston davlat chegarasining 12 kilometrdan ortiq qismini qo‘riqlashga mo‘ljallangan yangi “Sogment” chegara posti ochildi.

Qirg‘iziston prezidentining Botken viloyatidagi vakolatli vakilligi maʼlum qilishicha, yangi obyekt mamlakatning chegara hududlarida xavfsizlik infratuzilmasini rivojlantirish bo‘yicha amalga oshirilayotgan ishlar doirasida barpo etilgan.

Ochilish marosimida onlayn formatda Qirg‘iziston Chegara xizmati raisi Abdikarim Alimbayev ishtirok etdi. Joyning o‘zida esa prezidentning Botken viloyatidagi vakolatli vakili Mamirjan Rahimov, mahalliy hokimiyat organlari vakillari hamda harbiy xizmatchilar qatnashdi.

Tadbirda so‘zga chiqqanlar chegara xizmati xodimlarini kasb bayrami bilan tabriklab, yangi obyekt davlat xavfsizligini mustahkamlash va davlat chegarasida barqarorlikni taʼminlashda muhim ahamiyat kasb etishini taʼkidladilar.

Yangi postda xizmat olib borish uchun zamonaviy sharoitlar yaratilgan. Uning hududida yangi kazarma qurilgan bo‘lib, harbiy xizmatchilarning ishlashi va yashashi uchun zarur infratuzilma shakllantirilgan.