Turkiston va Toshkent viloyatlari aloqalarni kengaytirmoqda

Toshkent, O‘zbekiston (UzDaily.uz) — Toshkent viloyatida Turkiston va Toshkent viloyatlari o‘rtasidagi hududlararo hamkorlikni rivojlantirishga qaratilgan «Chegarasiz hamkorlik» xalqaro biznes-forumi bo‘lib o‘tdi.

Tadbir Qozog‘iston va O‘zbekiston prezidentlarining hududlararo hamkorlikni mustahkamlash bo‘yicha topshiriqlari doirasida tashkil etildi. Forumda ikki hududning rasmiy va ishbilarmon doiralari vakillari, shuningdek, 200 ga yaqin tadbirkor va investor ishtirok etdi.

Turkiston viloyati delegatsiyasiga viloyat hokimi N. Kusherov boshchilik qildi. Toshkent viloyati tomonidan esa viloyat hokimi Z. Mirzayev ishtirok etdi. Uchrashuvlar davomida tomonlar savdo-iqtisodiy, investitsiyaviy va turistik hamkorlikni kengaytirish istiqbollarini muhokama qildilar.

Sanoat kooperatsiyasini rivojlantirish va «Markaziy Osiyo» xalqaro sanoat kooperatsiyasi markazi loyihasini amalga oshirish masalalariga alohida eʼtibor qaratildi. Shuningdek, forum ishtirokchilariga Turkiston viloyatining investitsiyaviy va turistik salohiyati taqdim etildi.

Tadbir yakunlariga ko‘ra, tomonlar ishbilarmonlik aloqalarini kengaytirish va hududlar o‘rtasidagi iqtisodiy munosabatlarni mustahkamlashga qaratilgan qo‘shma investitsiya loyihalarini amalga oshirish bo‘yicha kelishib oldilar.